«Эжвадорса лирика»

Лöддза-номъя тöлысьын 17 лунö Паль сиктын мунiс «Эжвадорса лирика» мöд ландшафтнöй фестиваль, сыктывдiнса гижысьяслы сиöм гаж. Сöстöм, югыд, озыр чериа Эжва юыс, вöр-ваыс, помтöм – дортöм пармаыс, дерт жö, ышöдiсны гижысьясöс став сьöлöмсянь нимöдны ас чужан му, сикт – грездъяс, сэнi олысьясöс. Талун сикта школа дорса скверын Сыктывдiнса «Коми войтыр» отсöгöн восьтiсны тöдчана коми гижысь Иван Белыхлы памятнöй доска.
Тавося фестивальсö жö сиöма Коми Республикаса йöзкостса гижысь Геннадий Юшковлöн чужöмсяньыс кöкъямыс дас вит вося тшупöда паслы. Коми литератураса югыд шондi Геннадий Анатольевич Юшков чужис неыджыд коми грездын – Сiтбарын. Сылöн гижан сямыс дзоридзалысь видз кодь уна сикаса да рöма, паськыд, кыдз Коми мулöн помтöм – дортöм эрдъяс, пыдi, кыдз, тувсовъя ытва. Öд сiйö гижис верстьöлы да челядьлы, проза да поэзия, пьесаяс да статьяяс, висьтъяс да романъяс, сьöлöм кылана гижöдъяса да айму дорö муслуна чукöръяс, бур теш петкöдлысь шмонитан гижöдъяс. Уна кывбур сылöн лоисны сьыланкывъясöн да лыддьысьöны йöзкостöн. Ставыс, мый гижöма Геннадий Анатольевичöн, йиджтысьöма чужан му дорö, коми войтыр да коми кыв дорö помтöм радейтчöмöн.
Медся дона гöсьтяöн лои Геннадий Анатольевич Юшковлöн гöтыр Галина Евгеньевна Юшкова. Галина Евгеньевна висьталiс, кыдзи найö тöдмасисны Геннадий Анатольевичкöд.
Геннадий Юшковысь кывбуръяссö лыддисны Паль школаса велöдчысьяс Виолетта Торлопова, Елизавета Зинченко, Илья Муртузов да Наталья Белых, Час сиктса том морт Никита Дерябин, кодi öнi велöдчö медучилищеын.
Геннадий Юшков ачыс шулiс, мый кывбурыс пö меным кыдз медводдза радейтчöм – некор сылы эг изменитлы да пыр гижа. Кывбуръяс, кывпесанъяс, нöдкывъяс лыддисны Варвара Громова, Наталья Наговицына, Нина Размыслова, Людмила Муравьева, Елена Ваховская.
Кутшöм мича кывбуръясыс, кöнi шувгö помтöм вöр да дзоридзалö чöскыд дука льöм.
Ассьыныс кывбуръяссö лыддисны Зеленеч сиктысь самодеятельнöй кывбур гижысьяс, «СтихиЯ» клубö пырьяс Юлия Родионова, Маргарита Лисицкая, Валентина Салий.
Ок, и лöсьыдöсь жö сьыланкывъясыс, кодöс сьылiсны Михаил Оверин, Елена Уляшева да «Рябинушка» сьылан котыр..
Сэсся кыв босьтiс тöдчана коми фольклорист, этнограф, переводчик, гижысь Олег Уляшев. Олег Иванович Куломдiн районса Вöльдiнысь. Сыктывкарса каналан университет помалöм бöрын уджалö Коми научнöй шöринын кыв, литература да история институтын. Республикаса шылада да драма театрын пуктылiсны сылöн «Енкöлаяс йылысь поэма», «Йола гор» да «Гытсан» гижöдъяс серти спектакльяс. Петавлiсны «Орд ордын», «Кöмтöм нывкалы», «Излань зыран, зарни зыран» небöгъяс.
Сыктывдiн районса администрацияöн веськöдлысь Олег Лажаневсянь, администрацияса культура юкöнöн веськöдлысь Евгения Шеболкинасянь чолöмалiс «Коми войтыр» Сыктывдiнса Представительствоöм веськöдлысь Владимир Муравьев. Владимир Николаевич висьталiс, мый зэра поводдя вöсна ковмис нуöдны гажсö культура керкаын, но фестивальыс колис сэтшöм жö гажа. Владимир Муравьев аттьöалiс Елена Тыринаöс, Надежда Белых öтвылысь бура уджалöмысь да Никита Дерябинöс кывбур бура лыддьöмысь. Районса библиотекаясöн веськöдлысь Татьяна Крутова сетiс фестивальса участникъяслы аттьöалана гижöдъяс.
Фестиваль помын «Рябинушка» сьылан котырö пырысьяс сьылiсны гажа частушкаяс.
Важсянь коми йöз радейтiсны гажöдчыны. Да эз прöста гажöдчыны, а нуöдлiсны быдсяма обрядъяс, мед быдмис бур урожай, чужисны выль гозъя котыръяс да челядь. Мед аскиа олöмыс лоас бурджык да лöсьыдджык гаж нуöдысь Елена Тырина корис öтвылысь шуавны Геннадий Юшковлысь «Коми ёрдысь» кывъяс:
Мый оз шогöд, мый оз сулы
Огö бырöй Енмыс улысь!
Косйысямöй ниа пулы,
Косйысямöй чудлöн гулы,
Косйысямöй Эжва юлы,
Косйысямöй Коми мулы,
Косйысямöй сьöлöм тырöн – Некор татысь огö бырöй!
Нинöм вылö!
Ывлаын гöсьтъясöс виччысис чöскыд юква, кодöс гöтöвитiсны Паль сиктса юралысь Алена Громова да районнöй Сöветса депутат Максим Громов.
Öнi Паль сиктö корöны гöсьтъясöс арын тöдчана коми этнограф Алексей Семенович Сидоровлы сиöм чукöртчöм вылö.

ФОТОАЛЬБОМ