Завалинка
Учреждения культуры Сыктывдинского района
Май (ода – кора) 14 лунö Сёська сиктса кулътура керкаын вöлi петкöдлöма Геннадий Юшковлöн пьеса серти «Гöтыртöгыд абу олöм» теш коми кыв вылын. Ворсiсны тайö гажа петкöдчöмас Сёська сиктса олысьяс. Медшöр рольсö — дöвеч Мишö Васькаöс – зэв бура ворсiс кочегар Сергей Соколов. 50 арöса дöвеч сетö газетö юöр, мый корсьö аслыс гöтырпуöс. И со локтöны Васька ордö суседка Люба да мукöд сиктысь аньяс. Быдöн кöсйö сьöлöмсянь тöдмасьны сыкöд да öтлаасьны. Но жöник оз тöд кодöс бöрйыны да тшöктö аньяслы нöрöвитыштны. Аньясöс ворсiсны вузасянiнöн веськöдлысь Ольга Шурганова (суседка Люба), кага велöдысь Надежда Чеусова (Ия Габова), культура керкаысь художественнöй веськöдлысь Наталья Петрова (Альбина) да Сёська сиктса юралысь Людмила Огнева (Роза Макарова). Васькалöн вежаньлысь рольсö ворсiс сиктса водзмöстчысь Валентина Рочева. Тешыс помасьö «Шуда кад» сьылысь котырлöн мича сьыланкывъясöн, Васька да Люба гöтрасьöмöн. Сёська сиктса сьылысьяслы ёна отсасьö Районса культура керкаса хорöн веськöдлысь Ирина Чувьюрова. Час да джын мунiс петкöдчöмыс. Видзöдысьяс эз и дугдывны сералöмысь да клопайтöмысь. Зэв сьöлöмсянь да кужöмöн быдöн ворсiс рольсö. А пуктiс спектакльсö культура керкаöн веськöдлысь Надежда Бурдихина. Ыджыд аттьö висьталiс Сыктывдiн районса администрацияöн веськöдлысь Олег Лажанев. Сыктывдiн районса администрацияса культура юкöнöн веськöдлысь Евгения Шеболкина сiдзжö аттьöалiс ас кежысь ворсысь артистъясöс да тшöктiс водзö на лöсьöдны татшöм бур петкöдчöмъяссö. Локтам 2018 во лоö сиöма театрлы. Сыктывдiнса «Коми войтыр» Представительствоöн веськöдлысь Владимир Муравьев ас нимсяньыс да Эмилия Налимовасянь чолöмалiс артистъясöс бур ворсöмысь. Видзöдысьяс нимсянь бур кыв артистъяслы шуис сиктса олысь Антонина Федосеева. Сёська сиктса юралысь, «Единая Россия» партияса местнöй отделениеса веськöдлысь Людмила Огнева чолöмалiс партиясянь Надежда Чеусоваöс.
